Ш. Раҳимзода: «Дар соли 2012 табақаи миёнаи аҳолӣ ба 39 фоиз мерасад»

Душанбе, 25 июл. (АМИТ «Ховар», Лаззат Диловарзод).- Вазорати рушди иқтисод ва савдо бо мақсади суръат бахшидани ҷараёни таҳияи стратегияи навбатии миёнамӯҳлат лоиҳаи сохтор, консепсия ва шарҳи мухтасари онро барои солҳои 2013-2015 дар доираи Стратегияи миллии рушди ҶТ таҳия намуда, ба ҳукумати ҷумҳурӣ ирсол намудааст,- иброз дошт вазири рушди иқтисод ва савдо Шариф Раҳимзода дар нишасти имрӯзаи матбуотӣ ба хабарнигорон. Вазир сатҳи камбизоатии аҳолиро таҳлил намуда, дар муқоиса бо соли 1999 ду баробар коҳиш ёфтани онро яке аз дастовардҳои назарраси соҳаи иқтисодиёти кишвар номид. Дар соли 2012 то 39 фоиз паст шудани сатҳи камбизоатиро аз равандҳои боз ҳам беҳтар шудани сатҳи болоравии ҷиҳати иқтисодии аҳолӣ маънидод намуд.Тибқи ҳисобҳои пешакии Бонки Ҷаҳонӣ ва Вазорати рушди иқтисод ва савдои ҷумҳурӣ дар соли ҷорӣ табақаи миёнаи аҳолии ҷумҳурӣ 39 фоизро ташкил хоҳад дод, ки 19 фоизи он ҷавобгӯи меъёрҳои сатҳи ҷаҳонӣ хоҳад буд,-афзуд Шариф Раҳимзода. Вазир ҳамчунин аз он изҳори қаноатмандӣ намуд, ки дар давоми шаш моҳи аввали соли ҷорӣ дар доираи ҳамкориҳои дуҷониба ва бисёрҷониба бо давлатҳои иштирокчии ИДМ рафти иҷрои Протоколи ҷаласаи Комиссияҳои байниҳукуматӣ оид ба ҳамкориҳои иқтисодию тиҷоратии байни давлатҳои аъзои ИДМ, аз ҷумла бо Федератсияи Русия, Туркманистон, Украина, ҷумҳуриҳои Беларус, Қазоқистон ва Кирғизистонро пайваста таҳлил намуда, ҷиҳати самарабахш будани ин ҳамкориҳо ба ҳукумати ҷумҳурӣ гузориш дода мешавад. Вазир инчунин дар бораи бо сабабҳои гуногун кам шудани истеҳсоли маҳсулоти саноатии як қатор корхонаҳо маълумот дод ва дар доираи ҳамин масъалаҳо баҳси хабарнигорон бо мутахассисони вазорат сурат гирифт.