Ҳалокати 9 нафар дар як ҳафта

Душанбе, 13 август. (АМИТ «Ховар», Музаффар Рустамов). – Аз 06 то 13 августи соли ҷорӣ дар роҳҳои мошингарди ҷумҳурӣ 22 садамаи роҳу нақлиёт қайд шудааст, ки бар асари онҳо 9 нафар ба ҳалокат расида, 19 нафари дигар бо ҷароҳатҳои гуногуни ҷисмонӣ дар беморхонаҳо бистарӣ гардидаанд. Аз ҷумла, дар ноҳияи Рӯдакӣ ронандаи мошини тамғаи «ВАЗ-21015» Нуров Абдуманнон, соли таваллудаш 1977, ҳангоми ҳаракат аз самти шаҳраки Сомониён ба самти деҳаи Чорсӯ ба мошини тамғаи «ВАЗ-2106» таҳти идораи Фатҳулло Файзуллоев, соли таваллудаш 1977, бархӯрда ва аз роҳ баромада, пиёдагардон Васеленко Вера, соли таваллудаш 1974 ва писари хурдсолаш Темур Кабирови даҳсоларо зер мекунад, ки дар натиҷа пиёдагардон ҷароҳати вазнини ҷисмонӣ бардошта, дар беморхона ба ҳалокат мерасанд. Аз таҳлили садамаҳои рухдодаи роҳу нақлиётӣ бармеояд, ки аксари ин ҳодисаҳо дар ноҳияҳои тобеи марказ ба вуқўъ омадаанд. Аз ин хотир риояи қоидаҳои оддитарини ҳаракати роҳ ҳама гуна садамаҳои нақлиётиро пешгирӣ менамояд. Дар ин бора сардори шӯъбаи ташвиқоту тарғиботи Раёсати Бозрасии давлатии автомобилии Вазорати Корҳои дохиилии ҶТ Маҳмадшариф Шамсов иттилоъ дод.