Ҳ. Зарифӣ: «Тоҷикистон фоҷиаи мусалмонони Мянмарро қотеъона маҳкум мекунад»

Душанбе, 15 август. (АМИТ «Ховар», Мавҷуда Анварӣ). — 13 августи соли ҷорӣ дар шаҳри Ҷиддаи Арабистони Саудӣ нишасти ғайринавбатии вазирони корҳои хориҷии кишварҳои аъзои Созмони Хамкории Исломӣ доир гашт. Дар нишаст ҳайати ҶТ таҳти сарварии вазири корҳои хориҷии кишвар Ҳ. Зарифӣ ширкат намуд. Зимни суханронии худ вазир дар баёни масоили мавриди баррасӣ мавқеи Ҷумҳурии Тоҷикистонро иброз дошт: «ҶТ дар мавзӯи ҷавҳарии олами исломӣ мавқеъи Фаластинро комилан дастгирӣ менамояд ва фоҷиаи мусалмонони Мянмарро қотеъона маҳкум мекунад». Роҷеъ ба мавзӯи Сурия ҷониби Тоҷикистон таъкид дошт, ки бӯҳрони Сурия бояд бе дахолати хориҷӣ ба корҳои дохилии ин кишвар аз ҷониби мардуми Сурия ҳалли худро пайдо намояд. Намояндаи баландпояи Ҷумҳурии Тоҷикистон ишора намуд, ки нақшаи тарҳрезишудаи намояндаи собиқи муншии Созмони Милали Муттаҳид ва Лигаи давлатҳои араб дар масоили Сурия Кофе Анонро нахустқадам барои ҳалли қазияи ин кишвар медонад ва дар ин раванд ҷомеаи ҷаҳониро ба он даъват менамояд, то ҷонибҳои даргири низоъро ба ин иқдом водор намоянд ва кафолати ҳаёти ҳар як шаҳрванди Сурия таъмин карда шавад. Ёдовар мешавем, ки нишасти ғайринавбатии сарони кишварҳои аъзои Созмони Ҳамкории Исломӣ дар шаҳри Макка ду рӯз идома меёбад ва дар ин нишаст Президенти Чумҳурии Тоҷикистонро вазири корҳои хориҷӣ намояндагӣ мекунад. Дар ин бора аз Вазорати корҳои хориҷии кишвар иттилоъ доданд.