Ҷашнвораи филмҳои Би-Би-Си дар Тоҷикистон

Душанбе, 23 август. (АМИТ «Ховар», Мавҷуда Анварӣ). — Ба ифтихори 20-солагии фаъолияти хизматгузории ҷаҳонии Би-Би-Си дар Тоҷикистон аз 30 август то 2 сентябр дар шаҳри Душанбе намоиши филмҳои мустанад дар таҳияи Би-Би-Си доир мешавад.Ин ҷашнвора дар Хонаи синамои Иттифоқи синамогарони Тоҷикистон бо ибтикори Содиқи Сабо, раиси бахши форсии Би-Би-Си доир мешавад. Барнома шомили панҷ филми мустанад ба забони форсӣ буда, онҳоро бахши форсии Би-Би-Си таҳия кардааст.Дар чаҳорчӯби ин ҷашнвора филмҳои «Фарзандони Ленин» дар бораи зиндагӣ дар Тоҷикистон баъд аз 20 соли истиқлол, «Ҷони Дилафрӯз» дар бораи донишманди маъруф, академик Муҳаммадҷон Шакурӣ, «Умари Хайём: сафаре ба Эрон барои кашфи дубораи шоири порсигӯ», «Духтарони писарпӯш: дар бораи нақши занон дар Афғонистон» ва «Ислом дар Амрико», дар бораи ивазшавии зиндагии мусулмонони амрикоӣ пас аз амали террористии 11 сентябр намоиш дода мешавад.Намоиши бархе аз ин филмҳо дар шаҳри Хуҷанд низ ба нақша гирифта шудааст.Содиқи Сабо, раиси бахши форсии Би-Би-Си ба АМИТ «Ховар» иброз намуд, ки дарҳои ҷашнвораи филми Би-Би-Си барои ҳама боз аст ва изҳори умедворӣ кард, ки ин иқдом «барои эҷоди иртибот бо бинандагон ва шунавандагон, шунидани назарҳои онон ва дарки ин нукта, ки мо чӣ гуна метавонем барои мухотабони худ дар Тоҷикистон беҳтар хидмат кунем, заминаи мусоид фароҳам созад».Дар поёни ҷашнвора дар Хонаи синамо консерти ройгони Далер Назаров, овозхони маъруфи тоҷик, ки аз оҳангҳояш дар филми «Фарзандони Ленин» истифода шудааст, баргузор хоҳад шуд.