Хонаи фарҳанг дар деҳа

Бадахшон, 31 август. (АМИТ «Ховар», Лутфишои Додо). – Дар арафаи ҷашни истиқлолияти миллии Ҷумҳурии Тоҷикистон дар ҷамоати деҳоти Техарви ноҳияи Ванҷ Хонаи фарҳанг мавриди истифода қарор дода шуд. Пас аз анҷоми сафари кории Президенти мамлакат Эмомалӣ Раҳмон ба шаҳру навоҳии ВМКБ, вохӯрӣ бо фаъолон 12 июли соли 2010 нақшаи Ҳукумати Ҷумҳурӣ оид ба бунёди як қатор иншооти ҳаётан муҳим қабул гардидаанд, ки бунёди Хонаи фарҳанг дар ҷамоати Техарв яке аз онҳост. Моҳи апрели соли 2011 бо маблағи яку ним миллион сомонӣ корҳои сохтмонии Хонаи фарҳанг оғоз гардиданд. Бинои Хонаи фарҳанг аз утоқҳои корӣ, китобхона ва синфи компютерӣ иборат аст. Толори он дорои 150 ҷойи нишаст буда, имконият фароҳам меорад, то чорабиниҳои гуногуни фарҳангию фароғатӣ дар сатҳи баланд гузаронида шаванд.