Мусодираи яроқ идома дорад

Душанбе, 3 август. (АМИТ «Ховар»).-Имрӯзҳо корҳои фаҳмондадиҳиву пешгирикунанда дар шаҳри Хоруғи ВМКБ, ки чанде пештар вобаста ба содиршавии амалҳои ғайриқонунӣ аз ҷониби афроди алоҳидаи ҷиноятпеша дар сархати расонаҳои хабарӣ ҷойи аввалро касб намуда буд, бо маром идома дошта, он омили асосии сулҳу осоиштагии рӯзгори мардум ба шумор меравад.Бо ин даъвату ҳидояти хирадмандона шумораи зиёди ҷавонони гумроҳзада яроқу лавозимоти ҷангии худро ба мақомоти ҳифзи ҳуқуқ супорида, худро аз ҷавобгарии ҷиноӣ озод намуданд.Аз ҷумла, нимаи рӯзи гузашта низ дар шаҳри Хоруғ яроқҳои вазнини ҷангӣ, аз қабили гранатамёти РПГ, гранатамёти «Муха», гулӯлаҳои гранатамёти серистифода, автомати Калашников, таппончаву снарядҳо, норинҷакҳои гуногунтамға, снарядҳои минамёт, ва дигар аслиҳаву лавозимоти ҷангӣ мусодира ва ба мақомоти ҳифзи ҳуқуқ супорида шуд ва худи ҳамон рӯз маротибаи дуввум боз як миқдори зиёди яроқу лавозимоти ҷангӣ, аз қабили автомати Калашников, таппончаи тамғаи Макаров, норинҷакҳои тамғаи ф-1, ргд-5 ва тирҳои гуногунтамға мусодира шуданд.Дар ин минтақаи дурдасти кишвар имрӯз вазъ комилан ором буда, аҳолии он баҳри таъмини волоияти қонун ва нигоҳдории тартиботи ҷамъиятиву пешгирии ҷинояткорӣ бо кормандони мақомоти ҳифзи ҳуқуқ ҳамкорӣ намуда, дар халъи силоҳу таъмини оромӣ саҳми худро гузошта истодаанд.Дар ин бора ба АМИТ «Ховар» аз маркази матбуоти Вазорати корҳои дохилаи ҷумҳурӣ хабар доданд.