Талабагон бо китобҳои дарсӣ таъмин мешаванд?

Душанбе, 23 август. (АМИТ «Ховар», Ҳотам Рабиев).-Роҳбарияти Вазорати маориф баҳри беҳтар шудани таҳия, нашр ва муомилоти китобҳои дарсӣ ва илмию методӣ тадбирҳои мушаххас меандешанд. Аввалан тибқи тасмими вазорат кулли китобҳои дарсӣ ва методӣ бояд дар нашриёти ватанӣ чоп гарданд. Аз ҷумла, соли ҷорӣ 163 номгӯй китоби дарсӣ бо теъдоди 806 ҳазору 542 нусха нашр ва дастраси шӯъбаҳои маориф гардонда шуд. Ҳамчунин 124 ҳазору 699 нусха китоби гуногун, барнома ва маводи таълимӣ ба таври ройгон тақсим гардид.Тибқи иттилои директори Маркази таҳия, нашр ва муомилоти китобҳои дарсӣ, илмию методии назди Вазорати маорифи Ҷумҳурии Тоҷикистон Комил Исоев журналҳо барои синфҳои 5-11 дар ҶСШК «Матбуот» бо теъдоди 42 ҳазору 500 нусха нашр гардид, ки барои кулли мактабҳои ҷумҳурӣ басанда аст. Боиси тазаккур аст, ки тибқи тасмими Вазорати маориф китобҳои дарсӣ барои ақаллиятҳои миллӣ, барнома ва китобҳо барои кӯдакистонҳо ва методикаи таълими фанҳои гуногун таҳия ва нашр хоҳанд шуд. Ҳамчунин зиёда аз 100 ҳазор дафтари машқи хат барои синфҳои аввал чоп мегардад.