Тавсияҳои манфиатовари олимон

Душанбе, 31 август. (АМИТ «Ховар», Лаззат Диловарзод).- Олимони Пажӯҳишгоҳи хокшиносии Академияи илмҳои кишоварзии Тоҷикистон ба хоҷагиҳои деҳқонии вилоятҳои Суғду Хатлон ва минтақаи Рашт ҷиҳати беҳдошти ҳосилхезии хок, истифодаи самараноки замин, пешгирии таназзулёбӣ (эрозия)-и замин ва такроран аз шӯршавӣ нигоҳ доштани хок тавсияҳои манфиатнок доданд,- иброз дошт саркотиби Академия Давлатҷон Комилзода ба мухбири АМИТ «Ховар».Олимон дар хоҷагиҳои ноҳияи Файзобод бо усули тасма-тасма ҷойгиркунии зироати ғалладонагию ҷуворимакка ва тавассути обмонии қатрагӣ пешгирии таназзули хоки талу теппаҳоро тавсия намуданд. Бо ин усул 20-25 фоиз ҷорӣ шудани об кам гардида, 40-45 фоиз шусташавии хок нигоҳ дошта шуд. Олимон ҳамчунин барои нигоҳ доштани нами табиии хок тавассути хасу хошок ва баргу навдаҳои ангури тозакардашуда, рӯйпӯшкунии ҷӯйякҳои ангурбоғҳоро тавсия доданд, ки он намии хоки атрофи ангурро 1,5-2 баробар зиёд намуда, ба ҳосилнокии ангурбоғҳо дар заминҳои нишеб ва талу теппаҳо мусоидат намуд.