Баррасии ҳамкориҳои иқтисодӣ бо Туркманистон

Душанбе, 26 сентябр. (АМИТ «Ховар», Покиза Махмадбекова). – Имрӯз дар Душанбе вохӯрии вазири рушди иқтисод ва савдои ҷумҳурӣ Шариф Раҳимзода бо Сафири фавқулодда ва мухтори Туркманистон дар Ҷумҳурии Тоҷикистон Чинор Рустамова баргузор гардид. Аз маркази матбуоти вазорати мазкур ба мухбири АМИТ «Ховар» иттилоъ доданд, ки дар мулоқот Ш. Раҳимзода барои дастгирӣ ва ҳамкориҳои судманд дар соҳаҳои мухталиф ба сафир изҳори миннатдорӣ намуд. Чинор Рустамова дар навбати худ ба анъана, фарҳанг ва табиати зебои Тоҷикистон баҳои баланд дода, иброз дошт, ки ҳамчун Сафири фавқулодда ва мухтори Туркманистон дар Тоҷикистон баҳри вусъати муносиботи иқтисодию тиҷоратии ду кишвари бо ҳам дӯст аз тамоми имкониятҳои мавҷуда истифода хоҳад кард.