Баррасии бартарии технологияҳои мобилӣ дар Душанбе

Душанбе, 21 сентябр. (АМИТ «Ховар», Музаффари Рустам).- Конфронси дуюми байналмилалии «Бартарии технологияҳои мобилӣ барои рушди ҳукумати электронӣ дар кишварҳои Осиё», ки 25-26 сентябри соли равон дар Маркази тиҷоратии «Душанбе-Плаза» баргузор мегардад, беш аз 100 нафар мутахассис, мушовири байналмилалӣ ва намояндаи муассисаҳои давлативу ғайридавлатиро гирд меорад. Дар конфронс иштироки коршиносони байналмилалӣ аз Гурҷистон, Молдова, Филиппин, Ҳиндустон, Кореяи Ҷанубӣ, Русия ва Афғонистон дар назар аст.Ҳамчунин дар доираи конфронси мазкур 24 сентябр семинар дар мавзӯи «Асосҳои полисимейкинг оид ба Технологияҳои Иттилоотию Коммуникатсионӣ (ТИК) баҳри рушд» ва 27-28 сентябр дар вазорату идораҳои калидӣ оид ба бартарии технологияҳои мобилӣ ва пешбурди ҳукумати электронӣ мизҳои гирд баргузор мегарданд. Конфронси мазкурро Шӯрои ТИК-и назди Президенти Ҷумҳурии Тоҷикистон дар шарикии Ассотсиатсияи Интернет — сервис провайдерҳо ва ҷонибҳои манфиатдори рушди технологияҳои иттилоотиву коммуникатсионӣ бо кӯмаки молиявии Институти «Ҷамъияти Кушода» — Бунёди Мадад дар Тоҷикистон ва мақомоти иҷроияи маҳаллии ҳокимияти давлатӣ дар шаҳри Душанбе баргузор мекунанд. Сарпарастии расмии чорабиниро ҶСП «ТТ-mobile» ба ӯҳда дорад.