Баррасии масъалаҳои тиҷоратии Тоҷикистону Эрон

Душанбе, 26 сентябр. (АМИТ «Ховар»). — Имрӯз дар Палатаи савдо ва саноати Ҷумҳурии Тоҷикистон мулоқоти тоҷирони Тоҷикистону Эрон баргузор гардид.  Дар рафти вохӯрӣ иттилоъ дода шуд, ки тоҷирони Эрон тайи як ҳафта дар шаҳру вилоятҳои Тоҷикистон бо тоҷирони кишвар якчанд мулоқот доир намуданд. Раиси ПСС Шариф Саид иброз намуд, ки ҳамкориҳои ин ду кишвари ҳамзабону ҳамфарҳанг мустаҳкам гардида, бисёр созишномаҳои ҳамкорӣ низ ба имзо расидаанд. Мақсади асосии баргузории чорабинии имрӯза — густариш додани муносибатҳои тиҷоратӣ ва пеш аз ҳама гузаштан аз назар ба амал аст. Вай гуфт: «Ман хоҳиш менамоям, ки дар соли оянда, яъне моҳи майи соли 2013 намоиши молҳои саноатии вилояти Хуросони Шимолӣ дар Тоҷикистон гузаронида шавад». Тибқи маълумоти оморӣ, ҳаҷми умумии гардиши савдои хориҷӣ миёни Тоҷикистону Эрон дар соли 2011-ум 204,2 млн. доллари амрикоиро ташкил дод, ки назар ба соли 2010 ба андозаи 101,5 % афзоиш ёфтааст.