Чанд хабар аз хориҷи кишвар

Ҳалокати 30 нафар дар шимоли Покистон Душанбе, 19 сентябр. ( АМИТ «Ховар»).- Ба гуфти расонаҳои хабарии Би-Би-Си дирӯз дар шаҳри Каҳот, воқеъ дар қисми шимолии Покистон як мошини сабукрав ба автобусе, ки толибилмони Донишгоҳи исломии Покистонро баъди иштирок дар як мусобиқаи варзишӣ ба хонаҳояшон интиқол медод, ҳангоми ҳаракат бархӯрд. Дар вақти садама 30 нафар толибилм халок шуда, боқимонда захмҳои гуногун бардоштанд. Расонаҳои хабарии шаҳри Каҳот низ сабаби рўх додани фоҷеаро дар вайрону валангор ва таъмирталаб будани роҳҳои мошингард мебинанд. Бояд қайд кард, ки дар вақти ҳодиса дар дохили автобус 100 нафар толибилм будааст. Ихтирои дили сунъӣ Душанбе, 19 сентябр. ( АМИТ «Ховар»).- Ба гуфти расонаҳои хабарии Форс- НюС табибони Италия гузаронидани амалиёти ҷарроҳии дили сунъиро дар бадани кўдаки 16-моҳа бомуваффақият анҷом доданд. Ба гуфти сардори раёсати тандурустии Вазорати тандурустии ҷумҳурӣ ҷарроҳӣ аз тарафи мутахассисони беморхонаи кўдакона амалӣ шудааст. Табибон саломатии маризро хуб арзёбӣ менамоянд. Бояд гуфт, ки ин узви сунъӣ аз титан ва пластика тайёр шуда, вазнаш 11 граммро ташкил медиҳад. Ҳаҷмаш хурд мебошад, вале дар як дақиқа то ним литр хунро мегузаронад. Ба гуфти мутахассиси соҳа таҷҳизоти дар бадани кўдак насб шуда то дер гоҳ боқи хоҳад монд.Тарҷумаи Иброҳими Ҳабибуллоҳ