Директори ҶДММ «Тезпур» дастгир шуд

Душанбе, 11 сентябр. (АМИТ «Ховар», Мавҷуда Анварӣ). – 6-уми сентябри соли ҷорӣ кормандони шӯъбаи мубориза бар зидди ҷиноятҳои муташаккили мақомоти Вазорати корҳои дохилӣ дар вилояти Суғд муайян намуданд, ки директори ҶДММ «Тезпур» Маҳмуд Насруллоевич Раҳматови 33- сола, сокини маҳаллаи 12-и шаҳри Хуҷанд тибқи шартномаи қабули пардохтҳо аз 1-уми сентябри соли 2010 бо ҶСПКМ «Сомонком» ҳамкорӣ намуда, дар давраи фаъолияти кориаш бо маслиҳати пешакӣ бо муҳосиби ҶСП «Индиго-Тоҷикистон» Абулатиф Абдуманнонович Қаюмови 36 -сола, сокини маҳаллаи 19-и шаҳри Хуҷанд, бо роҳи сохтакорӣ ҳуҷҷатҳои муҳосибии 10-адад фармоиши пулӣ барои гузаронидани маблағҳои пулӣ ба миқдори умумии 3 230 000 сомонӣ дар моҳи майи соли 2012 тайёр кардаашро ба почтаи электронии ҶСП «Индиго-Тоҷикистон» ирсол намуда, бо ин роҳ маблағи мазкурро азхуд намудааст. Инчунин шаҳрванд М.Н. Раҳматов 2320670-сомонӣ маблағи пулии қабули пардохтҳои муштариёнро ба ҶСП «Индиго-Тоҷикистон» аз муҳосиботи ҶДММ «Тезпур» дар асоси ҳуҷҷатҳои муҳосибие, ки дар ихтиёраш қарор доштанд, гирифта, ба муҳосиботи ҷамъияти мазкур ҳисобот пешниҳод накарда, ҷамъ маблағи умумии 5 550 670 сомониро азони худ намуда, барои эҳтиёҷоти худ сарф кардааст. Аз рӯи ин ҳодиса парвандаи ҷиноӣ оғоз гардида, тафтишот идома дорад. Хабари мазкур дар сомонаи расмии ВКД интишор шудааст.