Ду бозии даври 16

Душанбе, 17 сентябр (АМИТ «Ховар», Аловиддин Бӯриев) -Дирӯз дар силсилаи бозиҳои даври 16-уми чемпионати мамлакат байни дастаҳои Лигаи олӣ тими «Парвоз» дар сафар тавонист дар дақиқаи 90-ум баъди голи задаи Мансур Ҳакимов соҳибони майдон- дастаи «Ҳосилот»-ро бо ҳисоби 1 бар 2 мағлуб намояд. Дар дидори дуввум «Истаравшан» бар «Зарафшон» бо натиҷаи қотеи 4 бар 1 пирӯз шуд.  Дар рақобати даври баргашти нимниҳоӣ барои Ҷоми Тоҷикистон дастаи «Регар ТадАЗ» «Гвардия»-ро ноком кард . Футболбозони ин даста ба дарвозаи ҳариф 8 голи беҷавоб зада, ба бозии ниҳоӣ роҳхат гирифтанд. Имрӯз дар ин радиф «Истиқлол» бо «Энергетик» қувва месанҷад. Дар вохӯрии аввал футболбозони «Истиқлол» бо натиҷаи 3 бар 1 ғолиб шуда буданд.