Маблағҳои иловагии Бонки ҷаҳонӣ барои лоиҳаҳои энергетикии Тоҷикистон

Душанбе, 3 сентябр.(АМИТ «Ховар», Покиза Маҳмадбекова).- Бонки ҷаҳонӣ дар бораи ба мавқеи иҷро расидани Созишномаи маблағгузории иловагӣ барои Лоиҳаи коҳиш додани талафоти энергетикӣ дар Тоҷикистон хабар дод. Ин ба лоиҳа имкон медиҳад, ки саъю кӯшишҳои Ҳукумати Ҷумҳурии Тоҷикистонро барои такмили истифодаи маблағ ва устувории бахши энергетика, беҳдошти ҳисоботи даромад аз хизматрасонӣ ҷиҳати интиқоли нерӯи барқ ва таҳқиқи имконоти судури захираҳои нерӯи барқ дастгирӣ карда шавад. Баъди дар ҳаҷми 18 миллион доллари амрикоӣ ба таври илова маблағгузорӣ намудани Бонки ҷаҳонӣ маблағи лоиҳаи коҳиш додани талафоти энергетикӣ 38 миллион доллари амрикоиро ташкил медиҳад. Мақсади лоиҳа коҳиш додани талафи тиҷоратӣ дар бахшҳои нерӯи барқ ва газ мебошад. Қобили зикр аст, ки дар ҳошияи ҳамкории Бонки ҷаҳонӣ ва Ҳукумати Ҷумҳурии Тоҷикистон дар бахши энергетика 6 лоиҳа дар амал татбиқ мешавад, ки маблағҳои онҳо тайи 10 соли охир 70 миллион долларро ташкил доданд.