Вохӯрӣ бо интихобкунандагон

Душанбе, 13 сентябр. (АМИТ «Ховар», Лаззат Диловарзод).- Дар доираи мулоқоту вохӯрии вакилони Маҷлиси намояндагони Маҷлиси Олии Ҷумҳурии Тоҷикистон бо интихобкунандагони худ, намояндагони ин мақоми олии қонунгузори кишвар Меҳроҷиддин Ҳакимов ва Зиёратшо Саъдулло бо истиқоматкунандагони шаҳри Роғун ва ноҳияи Файзобод вохӯрӣ анҷом доданд. Тибқи иттилои хадамоти матбуотии Маҷлиси намояндагон, дар мулоқот бештар ба масъалаҳои марбут ба ҳаёти иҷтимоиву иқтисодии ин минтақаи мамлакат таваҷҷӯҳи махсус зоҳир карда шуд. Таъкид гардид, ки тайи солҳои охир бо дастгирии роҳбарияти давлату ҳукумати кишвар ин нуқтаҳои аҳолинишини кишвар тамоюли рушду инкишофи устуворро касб кардаанд. Намояндагони мардумӣ, ҳамчунин таваҷҷӯҳи интихобкунандагони худро ба фаъолияти намояндагии вакилони Маҷлиси намояндагони Маҷџлиси Олии Ҷумҳурии Тоџикистон, қонуну қарорҳои қабулнамудаи ин мақоми олии қонунгузор ҷалб намуданд. Зикр гардид, ки вакилони Маџлиси намояндагон бо мақсади мусоидат намудан ба фаъолиятҳои соҳаҳои гуногуни хоҷагии халқи мамлакат дар доираи қонунҳои амалкунанда як қатор тағйиру иловаҳо ворид кардаанд. Аз ҷумла ворид намудани тағйиру иловаҳо ба Кодекси замини Ҷумҳурии Тоҷикистон дастрасии мардумро ба замин ва ба таври мунсифона ва самаранок истифода намудани онро осон намуда, барои некӯаҳволӣ ва беҳтар гардидани вазъи зиндагии мардуми кишвар заминаи қонуниву ҳуқуқӣ фароҳам меорад. Дар мулоқоти вакилони Маҷлиси намояндагон бо интихобкунандагон, ҳамчунин дар бораи Кодекси нави андоз, ки рӯзи 5 – уми сентябр дар ҷаласаи ғайринавбатии ин мақоми олии қонунгузор қабул гардид, изҳори назар карда шуд. Масъалаҳои марбут ба мактабу маориф, аз ҷумла ҷалби ҷавонон ба омӯзиши илмҳои муосир, омодагӣ ба зимистони дар пешистода, ҷамъоварии ҳосили бо заҳмат рӯёндаи деҳқонон ва ғайра аз ҷумлаи масъалаҳое буданд, ки дар ин вохӯриҳо баррасӣ шуданд. Дар интиҳои вохӯрӣ байни вакилони Маҷлиси намояндагон ва интихобкунандагон саволу посухҳо роҷеъ ба мавзӯъҳои гуногун сурат гирифтанд.