Фарзанди қаҳрамон- сармураббии тими мунтахаби кишвар

Душанбе, 31 октябр. (АМИТ «Ховар», Музаффар Рустамов). – Бо сабаби ба кори дигар гузаштани Носир Бозоров бо қарори Кумитаи иҷрояи Федератсияи дзюдои кишвар дар мувофиқа бо Кумитаи ҷавонон, варзиш ва сайёҳӣ Саидаҳтам Раҳимовро сармураббии тими мунтахаби кишвар оид ба дзюдо таъин намуданд.  Саидаҳтам Раҳимов фарзанди қаҳрамони ҷаҳон Саидмуъмин Раҳимов буда, иштирокчии Бозиҳои олимпии тобистонаи ИМА дар соли 1996, 2-карат барандаи ҷоми чаҳон оид ба самбо-дар соли 1996-1998, Чемпиони ҷаҳон оид ба самбо байни давлатҳои хурд, дорандаи медали нуқраи Чемпионати ҷаҳон дар Панама оид ба самбо, барандаи медали биринҷии Чемпионати Осиё оид ба дзюдо дар Деҳлӣ, чемпиони Иттиҳоди давлатҳои мустақил оид ба дзюдо, Устоди хизматнишондодаи Ҷумҳурии Тоҷикистон мебошад. Дар ин бора аз Кумитаи миллии олимпии ҶТ Муродалӣ Тешаев иттилоъ дод.