М.улоқоти Қ. Расулзода бо вакилони ҳаракати бонуфуз

Душанбе, 17 октябр. (АМИТ «Ховар» Ибодат Давлатова)- 16 октябри соли равон Конфронси IV Ҳаракати ҷамъиятии ваҳдати миллӣ ва эҳёи Тоҷикистон дар вилояти Суғд баргузор гардид. Тавре ки ба мухбири АМИТ «Ховар» аз хадамоти матбуоти раиси вилояти Суғд хабар доданд, дар кори конфронс, ки таҳти раёсати раиси Ҳаракати ваҳдати миллӣ ва эҳёи Тоҷикистон дар вилоят, раиси вилояти Суғд Коҳир Расулзода сурат гирифт, 185 нафар вакил иштирок намуданд. Бояд гуфт, ки дар конфронс 9 масъала мавриди баррасии вакилон қарор гирифт. Раиси вилоят гуфт: «Мо имрӯз бо итминони комил гуфта метавонем, ки саҳми Ҳаракати ҷамъиятии ваҳдати миллӣ ва эҳёи Тоҷикистон воқеан ҳам дар таҳкими сулҳи тоҷикон, рушди босуръати тамоми ҷабҳаҳои рӯзгори халқ, шинохти дину оин ва арҷ гузоштани бузургони миллат хеле намоён аст». Инчунин қайд гардид, ки 1 ҳазору 175 ташкилоти ибтидоии ҳаракат дар шаҳру ноҳияҳои вилоят, ки бештар аз 700 ҳазор аъзоро фаро гирифтаанд, бо ҷалби қувваҳои азими илмию эҷодӣ, адабию фарҳангӣ, сиёсиву ҷамъиятӣ тавонист бо иҷрои рисолати таърихии худ дар таъмин ва расидан ба ҳадафҳои олии давлатдорӣ саҳми арзишманд гузорад. Дар охир иштирокчиёни конфронс ба Анҷумани IV Ҳаракати ҷамъиятии ваҳдати миллӣ ва эҳёи Тоҷикистон 76 нафарро аз вилояти Суғд ҳамчун вакил интихоб намуданд.