Ҳайати парлумонӣ озими шаҳри соҳили Нева мегарданд

Душанбе, 21 ноябр.(АМИТ «Ховар», Марзия Саидова).-Шоми имрўз ҳайати парлумонии Тоҷикистон таҳти сарварии Шукурҷон Зуҳуров –раиси Маҷлиси намояндагони Маҷлиси Олии ҷумҳурӣ озими шаҳри Санкт-Петербурги Русия мегардад. Муҳаммадато Султонов-котиби матбуотии палатаи поёнии парлумони мамлакат ба АМИТ «Ховар» иттилоъ дод, ки ҳадафи сафари ҳайати парлумонии Тоҷикистон ба шаҳри соҳили Неваи Русия иштирок дар кори ҷаласаи навбатии Шўрои Ассамблеяи байнипарлумонии /АБ/кишварҳои аъзои Иттиҳоди Давлатҳои Мустақил /ИДМ/, иҷлосияи умумии 38-умини ин созмон, ҷаласаи Бюрои АБ давлатҳои аъзои ИДМ , ҷаласаҳои АБ Созмони Аҳдномаи Амнияти дастаҷамъӣ /СААД/ ва давлатҳои аъзои Иттиҳоди иқтисодии АвруОсиё аст. Интизор меравад, ки ҳамзамон ҳайати парлумонии Тоҷикистон дар конфронси байналмиллалӣ, ки дар мавзўи «Чингиз Айтматов: якпорчагӣ ва гуфтугўи тамаддунҳо» ва маросими ифтитоҳи намоишгоҳ бахшида ба осори Чингиз Айтматов ва дар ҳамоиши илмии АвруОсиёӣ таҳти унвони « Якпорчагии иқтисодии АвруОсиё: ташаккул ва рушд» иштирок намояд. Дар назар аст, ки Шукурҷон Зуҳуров –раиси палатаи поёнии парлумони Тоҷикистон дар ҷараёни сафараш ба Санкт-Петербурги Русия бо раисони парлумонҳои кишварҳои ИДМ мулоқот намояд.