Ҳодисаҳои ришвахӯрӣ фош гардиданд

Душанбе, 22 ноябр. (АМИТ «Ховар», Лутфия Эшонқулова ). – Прокурори генералии Ҷумҳурии Тоҷикистон Шерхон Салимзода дар ҷаласаи роҳбарони мақомоти мубориза бо коррупсия ва ваколатдорони ҳуқуқи инсони кишварҳои аъзои Созмони ҳамкории иқтисодӣ зикр намуд, ки «дар ҳоли ҳозир коррупсия дар Тоҷикистон дар сатҳи миёна қарор дорад». Мувофиқи суханони мавсуф, ҳоло Ҳукумати Тоҷикистон, аз ҷумла мақомоти прокуратура, зидди коррупсия фаъолона мубориза мебаранд. Тайи ду соли охир Прокуратураи генералии ҷумҳурӣ 1400 ҷинояти коррупсиониро ошкор намуд. Дар ҷараёни тафтишот 63 ҳодисаи ришвахӯрии кормандони мақомоти прокуратура фош гардид. Дар ҷаласа роҳбарони мақомоти мубориза бо коруппсия ва ваколатдорони ҳуқуқҳои инсон аз Тоҷикистон, Қазоқистон, Қирғизистон, Эрон, Афғонистон, Покистон ва Туркия иштирок доштанд.Мақсад аз ташкили ин маркази минтақавӣ таҳкими ҳамкории байни мамлакатҳои аъзои Созмони ҳамкории иқтисодӣ дар масоили мубориза бо ҳамаи шаклҳои коррупсия ва ҳимояи ҳуқуқҳои инсон мебошад.