Ҷамъомади тантанавӣ ба ифтихори Иҷлосияи таърихӣ

Душанбе, 14 ноябр. (АМИТ «Ховар», Ибодат Давлатова).- 13 ноябри соли ҷорӣ дар Вазорати рушди иқтисод ва савдо бахшида ба 20-умин солгарди Иҷлосияи 16-уми таърихии Шӯрои Олии Ҷумҳурии Тоҷикистон ҷамъомади тантанавӣ баргузор гардид. Дар чорабинӣ роҳбарият ва кормандони Дастгоҳи марказии Вазорати рушди иқтисод ва савдо, намояндагони Суди конститутсионии Ҷумҳурии Тоҷикистон ва собиқадорони хизмати давлатӣ ва ҷамъиятӣ, иштирокчиёни иҷлосияи сарнавиштсоз ширкат варзиданд.Дар ҷамъомад иштирокчиён дар бораи аҳамияти таърихии Иҷлосияи 16-уми Шӯрои Олӣ дар низоми давлатдории навини тоҷикон, саҳми Сарвари давлат Эмомалӣ Раҳмон дар таҳкими сулҳу субот дар кишвар мухтасар сухан гуфтанд. Инчунин оид ба нақши Иҷлосияи 16-уми Шӯрои Олӣ дар таърихи миллати тоҷик, ҳадафҳои баргузории ин иҷлосия, аҳамияти қарорҳои қабулкардаи он, барқарор намудани сулҳу созиш ва фаъол гардонидани шохаҳои ҳокимияти давлатӣ, сабабҳои дар шаҳри Хуҷанд баргузор гардидани он изҳори назар шуд. Дар анҷоми ҷаласаи тантанавӣ меҳмонон бо туҳфаҳои хотиравӣ қадрдонӣ шуданд.