Аҳолии деҳоти кишвар афзудааст

Душанбе, 26 ноябр.(АМИТ «Ховар», Марзия Саидова).-Дар давоми даҳ соли охир дар кишвар шумораи аҳолии шаҳру шаҳракҳо ба 380,6 ҳазор нафар ё 23,4 % ва шумораи аҳолии деҳот 1056,4 ҳазор нафар ё 23,5 % афзудааст, гуфта мешавад дар гузориши Агентии омори назди Президенти Ҷумҳурии Тоҷикистон. Чунон ки аз маълумотҳои барўйхатгирии аҳолӣ ва фонди манзил дар соли 2010 бармеояд, таносуби аҳолии шаҳру шаҳракҳо ва маҳаллаҳои деҳот дар қиёс бо натиҷаҳои барўйхатгирии аҳолии соли 2000 тағйир наёфтааст. Ҳиссаи аҳолии шаҳраку шаҳракҳо дар шумораи умумии аҳолӣ 26,5 % ва мутаносибан ҳиссаи аҳолии деҳот дар шумораи умумии аҳолӣ 73,5 %-ро ташкил медиҳад.Яке аз омилҳои асосии афзоиши аҳолии кишвар зиёд будани таваллуд нисбат ба фавт маҳсуб мешавад.