Бинои нави нозироти андоз дар Бохтар

Душанбе, 7 ноябр. (АМИТ “Ховар”, Дилшодаи Хайруллоҳ).-Кормандони нозироти андоз дар ноҳияи Бохтари вилояти Хатлон соҳиби бинои наву замонавӣ ва муҷаҳҳаз бо таҷҳизоти муосир гардиданд.  Бинои нави маъмурии нозироти андоз дар ноҳияи мазкур аз тарафи Ҷамъияти саҳомии кушодаи “Корезлоиҳа” соли 2011 лоиҳакашӣ шуда, моҳи декабри худи ҳамон сол аз ҷониби пудратчии асосӣ ҶДММ “Осарӣ” сохтмони он дар масоҳати 349,4 метри мураббаъ оғоз гардид ва дар арафаи таҷлили Рӯзи Сарқонуни Ҷумҳурии Тоҷикистон мавриди баҳрабардорӣ қарор гирифт. Бинои нави нозироти андоз дар ноҳияи Бохтар аз 2 ошёна, маҷлисгоҳ, толорҳои хизматрасонӣ, утоқҳои корӣ ва таҳхона иборат буда, шароити хуби корӣ фароҳам оварда шудааст.