Форуми «Дӯстии безавол»

Душанбе, 26 ноябр. (АМИТ «Ховар», Людмила Дубинина ). – Бо ибтикори намояндагии ҳамкории Русия дар ҶТ ва Ҷамъияти дӯстӣ ва равобити фарҳангии Тоҷикистон бо кишварҳои хориҷӣ дар шаҳри Душанбе форуми ҷамъиятҳои дӯстӣ ва иттиҳодияҳои миллӣ таҳти унвони «Дӯстии безавол» бахшида ба 20 – солагии иҷлосияи 16 – уми Шӯрои Олии Ҷумҳурии Тоҷикистон баргузор гардид. Ин ҷамъомад чорабинии муҳиме дар амри таҳким бахшидани равобити гуманитарию фарҳангӣ, ҳамфикрӣ ва дӯстии байни халқҳои сокини Ҷумҳурии Тоҷикистон маҳсуб меёбад. Дар ҳошияи форум маросими муаррифии шумораи навбатии маҷаллаи «Дӯстӣ» баргузор гардида, фаъолони ҷамъияти дӯстӣ, ходимони илму фарҳанг, ки ба густариши дӯстӣ ва равобити фарҳангии байни халқу кишварҳо саҳми назаррас гузоштаанд, бо ифтихорномаҳои Ҷамъияти дӯстӣ ва равобити фарҳангии Тоҷикистон бо кишварҳои хориҷӣ мукофотонида шуданд.