Марши тантанавӣ бахшида ба рӯзи милитсия

Душанбе, 9 ноябр. (АМИТ «Ховар», Лутфия Эшонқулова).- Субҳи имрӯз бахшида ба Иди касбии кормандони милитсия дар майдони 800-солагии Маскави шаҳри Душанбе бо иштироки бахшҳои сафорои мақомоти корҳои дохилӣ, Қӯшунҳои дохилӣ, Академияи ВКД, ротаи зудамали махсуси милитсия, РБДА, дастаи таъиноти махсуси милитсия, взводи савора, техника ва нақлиёти махсуси бахшҳои алоҳидаи мақомоти корҳои дохилӣ марши тантанавӣ доир гардид. Ҷараёни марши тантанавиро вазири корҳои дохилӣ Рамазон Раҳимов ва ҳайати роҳбарикунандаи Вазорати корҳои дохилӣ назорат намуданд. вазири корҳои дохилӣ аз иқтидори техникӣ, ҳолати омодабошии ҷангӣ ва ҳамаҷонибаи кормандони мақомоти корҳои дохилӣ изҳори қаноатмандӣ намуда, махсус зикр намуд, ки имрӯз ин сохтори қудратии мамлакат омода аст, то ҳама гуна қувваҳои ҷиноятиро маҳв ва безарар гардонида, аз иҷрои ҳама амру супоришҳо бо сарбаландӣ барояд.Вазири корҳои дохилӣ инчунин аз боғчаи кӯдаконаи «Табассум»-и назди Вазорати корҳои дохилӣ низ дидан намуда, бо масъулини боғча ҳамсуҳбат гардид ва ба онҳо дар руҳияи ватандустиву ифтихори миллӣ тарбият намудани кӯдаконро тавсия дод.Дар боғча барои тарбиягирандагон тамоми шароити маишиву таълимӣ фароҳам оварда шуда, ошхона ва хонаҳои дарсии боғча аз таъмири замонавӣ бароварда шуданд.Тарбиятгирандагон низ ҳамчун ҳомиёни ояндаи низому тартибот бо барномаи махсус кормандони милитсияро табрик гуфтанд.