Пешбурди фаъолияти Академия дар заминаи 77 мавзӯъ

Душанбе, 20 ноябр. (АМИТ «Ховар», Лаззат Диловарзод).- Тавассути фаъолияти 428 ходими илмӣ, аз ҷумла 25 доктор, 128 номзади илм,6 академик ва 9 аъзои вобастаи Академияи илмҳои кишоварзии Тоҷикистон (АИКТ) дар давоми моҳҳои январ-ноябр дар заминаи 77 мавзӯи илмию таҳқиқотӣ корҳои зиёд анҷом пазируфт,- иброз дошт саркотиби Академияи илмҳои кишоварзии Тоҷикистон Давлатҷон Комилзода ба мухбири АМИТ «Ховар». Фаъолияти Академия барои ҳалли масъалаҳои рӯзмарраи таъминоти илмии кишоварзии Тоҷикистон равона шудааст. Дар давоми ёздаҳ моҳи соли ҷорӣ аз рӯи барномаҳои тасдиқгардида дар филиалу озмоишгоҳ, пойгоҳҳои илмию хоҷагиҳои таҷрибавии минтақаҳои гуногуни ҷумҳурӣ корҳои илмию таҳқиқотӣ амалӣ гардида, натиҷаҳои муайян ба даст оварда шудааст.-«Ҳоло дар сохторҳои академия 6 пажӯҳишгоҳи илмии соҳавӣ (зироаткорӣ, боғдорию сабзавоткорӣ, хокшиносӣ, чорводорӣ, ветеринарӣ, иқтисодиёти кишоварзӣ), Маркази миллии ҷумҳуриявии захираҳои генетикӣ, Озмоишгоҳи таҷрибавии кишоварзии Помир ва Корхонаи илмию истеҳсолии «Маводи биологӣ» шомиланд, ки ҳар кадоми онҳо аз рӯи соҳаи худ фаъолиятҳои илмию таҳқиқотиро анҷом медиҳад»,- афзуд саркотиби Академия Давлатҷон Комилзода.