Шиносоии ҳайати Суди конститутсионӣ бо фаъолияти ҳамкасбони украинии худ

Душанбе, 7 ноября. (НИАТ «Ховар», Лутфия Эшонкулова).-Намояндагони Суди конститутсионии Ҷумҳурии Тоҷикистон дар кори семинари илмӣ – амалӣ дар Украина, ки ба фаъолияти дастгоҳи Суди Конститутсионии Украина бахшида шуда буд, ширкат варзида, бо санадҳои меъёрии ҳуқуқии танзимкунандаи фаъолияти Суди конститутсионии Украина шиносоӣ пайдо намуданд. Дар рафти чорабинии мазкур аъзои ҳайати дастгоҳи Суди конститутсионии Ҷумҳурии Тоҷикистон ҳамчунин бо тартиби пешниҳод ва баррасии муроҷиати номаҳо ба ин мақомоти назорати конститутсионӣ, фаъолияти ёрдамчиёни судяҳо, коллегияҳои судӣ, тартиби омода намудани хулосаи экспертӣ вобаста ба парванда ва дигар паҳлўҳои фаъолияти дастгоҳи Суди конститутсионии Украина аз наздик шиносоӣ пайдо намуда, дар масъалаҳои мухталифи соҳавӣ бо ҳамкасбони хориҷии худ табодули назар намуданд.Тавре, ки сомонаи расмии Суди конститутсионӣ хабар медиҳад, дар ҷараёни сафари мазкур ҷиҳати густариши ҳамкориҳои тарафайн вохўрии ҳайати дастгоҳи Суди конститутсионии Ҷумҳурии Тоҷикистон бо Раиси Суди конститутсионии Украина А. Головин ва роҳбарияти дастгоҳи Суди Украина доир гардид ва дар он масъалаҳои муҳими марбут ба фаъолияти мақомоти назорати конститутсионӣ ва дастгоҳҳои он ибрози андеша карда шуд.