«Созандагони Ватан» дар Форуми Карелия

Душанбе, 22 ноябр. (АМИТ “Ховар”, Дилшодаи Хайруллоҳ).- Чанде пеш дар шаҳри Петрозоводски ҷумҳурии Карелияи Федератсияи Русия форуми иқтисодии ҷавонон баргузор гардид, ки дар он намояндагони кишварҳои мухталифи дунё ширкат варзиданд. Тоҷикистонро дар ин форум намояндаи ташкилоти ҷамъиятии «Созандагони ватан» Хусрав Дӯстов намояндагӣ кард. Номбурда гуфт, ки дар форум масоили иқтисодии ҷавонони соири кишварҳои дунё мавриди баррасӣ қарор гирифт. Дар ҳамоиши бошукуҳ намояндагони мамлакатҳои дуру наздик перомуни мушкилот ва паҳлуҳои мухталифи ҳаёти ҷавонон сухан карданд. Намояндаи Тоҷикистон Хусрав Дӯстов низ роҷеъ ба баъзе аз масъалаҳои вобаста ба ҷавонони кишвар ибрози андеша намуд. Лозим ба ёдоварист, ки намояндагони ташкилоти ҷамъиятии «Созандагони ватан» аз замони таъсиси он то кунун ба якчанд кишвари хориҷӣ сафари корӣ анҷом дода, дар ҳамоишҳову ҷамъомадҳои мухталиф ширкат варзидаанд, ки ин аз фаъолияти вусъатноки ин ташкилот шаҳодат медиҳад.