Тахсиси 600 миллион евро аз Иттиҳоди Аврупо ба Тоҷикистон

Душанбе, 29 ноябр. (АМИТ «Ховар», Дилшодаи Хайруллоҳ)- Имрӯз Президенти Ҷумҳурии Тоҷикистон Эмомалӣ Раҳмон намояндаи олии Иттиҳоди Аврупо оид ба корҳои хориҷӣ ва сиёсати амниятӣ хонум Кетрин Эштонро ба ҳузур пазируфт. Дар ин дидор масоили ҳамкории кунунии Ҷумҳурии Тоҷикистон ва Иттиҳоди Аврупо дар арсаҳои гуногун мавриди баррасӣ қарор гирифт. Мавзӯоте, чун татбиқи босамари ислоҳоти кишоварзӣ ва иқтисодӣ дар Тоҷикистон аз мавзуъҳои меҳварии ин мулоқот буданд. Кетрин Эштон пас аз мулоқот бо Президенти Ҷумҳурии Тоҷикистон Эмомалӣ Раҳмон дар ҳузури намояндагони воситаҳои ахбори умум ҳадафи сафари худ ба минтақаро истиқрори муколама, табодули афкору муносибатҳои кишварҳои минтақа бо Иттиҳоди Аврупо, инчунин таъмини амният дар Афғонистон унвон карда, зикр намуд: «Зимни мулоқоти худ бо муҳтарам ҷаноби Президент мо тақдири ояндаи Афғонистонро мавриди муҳокима қарор додем. Бояд бигӯям, ки ҷониби Иттиҳоди Аврупо барои ҳузури худ дар ин кишвар пас аз давраи соли 2014 тасмимҳо дорад. Мо аҳамияти мусоидати фарогир ба Афғонистонро пас аз соли 2014 таъкид намудем”. Ба таъкиди Кетрин Эштон дар ин дидор дар баробари матраҳ гардидани мавзуоти марбут ба соҳаи обу энергктика дар кишвар, инчунин баъзе мушкилоту чолишҳои дар самту арсаҳои мухталиф дар кишварҳои ин минтақа ҷойдошта ёдовар шудааст. Номбурда иброз намуд, ки ҷониби Иттиҳоди Аврупо аз танқисӣ ва эҳтиёҷоти гарони энергетикии Тоҷикистон хуб огоҳ аст ва аз ин рӯ, ба роҳ мондани ҳамкориҳои мутақобилан судманд дар ин соҳаро ба манфиати кор хонд. Ба ақидаи Кетрин Эштон, ҷониби Тоҷикистон ҷиҳати рафъи мушкилоти энергетикии худ роҳҳои алтернативии бунёд ё тавлиди энергетикаро бояд пеш гирад. Дар робита ба ин мавсуф таъкид дошт, ки “Дар ин росто ман бо муҳтарам ҷаноби Президент сари он ҳамфикр будем, ки кор ва фаъолияти Бонки Ҷаҳонӣ дар ин арса хеле муҳим мебошад.”Кетрин Эштон аз омодагии Тоҷикистон ҷиҳати пайвастан ба созмони ҷаҳонии савдо изҳори хушнудӣ намуда, Иттиҳоди Аврупоро ҷонибдори роҳандозии ислоҳоти иқтисодӣ дар Тоҷикистон унвон кард. Тибқи иттилои намояндаи олии Иттиҳоди Аврупо Кетрин Эштон аз ҷониби Иттиҳоди Аврупо ба Тоҷикистон дар давоми 20 соли охир ба Тоҷикистон қариб 600 миллион евро тахсис шудааст. Номбурда аз ба тасвиб расидани Созишнома ҷиҳати таъмини низоми самараноки соҳаи кишоварзӣ дар Тоҷикистон, ки дар ҳаҷми умумии беш аз 16 миллион евро татбиқ гардидаву ба раванди татбиқи ислоҳоти соҳаи кишоварзӣ мусоидат мекунад, изҳори хушнудӣ намуда иттилоъ дод, ки дар баробари баррасии мавзуоти мухталиф дар ин дидор доир ба таъмини ҳуқуқ ва озодиҳои инсон, рушди ҷомеаи шаҳрвандӣ дар кишвар ва ба ин васила фароҳам овардани фазои хуби сармоягузорӣ мубодилаи афкор сурат гирифт.