Ҷамъбасти пурсиши ҳармоҳаи ФФТ

Душанбе, 14 декабр. (АМИТ «Ховар»). – Федератсияи футболи Тоҷикистон (ФФТ) натиҷаи пурсиши ҳармоҳаро, ки моҳи ноябр роҳандозӣ шуд, ҷамъбаст намуд.Аксарияти мутахассисон дар бахши «Бозингари беҳтарини моҳи ноябр» ба тарафдории ҳамлагари дастаи «Равшан» — и шаҳри Кӯлоб Наврӯз Рустамов овоз доданд.Маъруф Рустамов, ки дастааш бори нахуст дар таърихи мусобиқоти кишвар қаҳрамони Тоҷикистон гардид, мураббии беҳтарин дар моҳи ноябр дониста шуд. Хотирнишон месозем, ки Маъруф Рустамов ду моҳ паи ҳам мураббии беҳтарин дониста шудааст.Дар бахши «Довари беҳтарини моҳи ноябр» довари таҷрибадори пойтахт Раҳмон Муртазоев пирӯз шуд.Ҷоизони моҳи ноябр — Наврӯз Рустамов, Маъруф Рустамов ва Раҳмон Муртазоев ҳар кадом бо мукофоти Федератсияи футболи Тоҷикистон дар ҳаҷми 500 сомонӣ сарфароз мешаванд.Федератсияи футболи Тоҷикистон вақтҳои наздиктарин бозингарони беҳтарин (дарвозабон, ҳимоятгар, нимҳимоятгар, ҳамлагар), мураббӣ ва довари мавсими соли 2012 – ро эълон мекунад.Дар ин бора аз Федератсияи футболи Тоҷикистон ба АМИТ «Ховар» хабар доданд.