Афзоиши ҳаҷми маҳсулот дар Суғд

Душанбе, 25 декабр. (АМИТ «Ховар», Бекназари Абӯбакр). — Истеҳсоли маҳсулоти саноатӣ дар вилояти Суғд тӯли 5 соли охир 3,8 маротиба, истеҳсоли маҳсулоти кишоварзӣ 3 маротиба, ҳаҷми гардиши савдои дохилӣ ва хориҷӣ мутаносибан 2,5 маротиба, хизматрасонии пулакӣ ба аҳолӣ 4,6 маротиба афзуда, сатҳи тавварум ба ҳисоби миёна -1,3 дарсад коҳиш ёфт. Сомонаи расмии мақомоти иҷроияи ҳокимияти давлатии вилояти Суғд иттилоъ медиҳад, ки чунин тамоюли рушд асосан аз тариқи истифодаи самараноки захираю имкониятҳо амалӣ гардида, стратегияи инкишоф асосан тавассути таъсиси ҷойҳои нави корӣ, бахусус дар ҷараёни истеҳсолот роҳандозӣ гардид. Танҳо тӯли 2 соли охир дар соҳаи саноати вилоят қариб 170 корхонаи хурду миёна бо теъдоди зиёда аз 7000 ҷойи нави корӣ таъсис ва дар давраи сипаригаштаи сол қариб 2000 гектар замин ба гардиши кишоварзӣ ворид гардида, 500 гектар замин ва намудҳои нави хизматрасонӣ аз худ шуданд, ки ин ҷиҳати дарёфт намудани захираю имкониятҳои иловагӣ барои ташаккули манбаи нави андозбандӣ шароит фароҳам овард.