Афзоиши парвозҳо ба самти Дубай

Душанбе, 12 декабр. (АМИТ «Ховар», Мавзуна Бойева).- Ширкати ҳавопаймоии «Сомон Эйр» афзоиши парвозҳоро ба самти Дубай эълон медорад. Тавре ки ба АМИТ «Ховар» аз маркази матбуоти ширкати мазкур хабар доданд, аз 17-уми декабр парвозҳо дар хатсайри Душанбе-Дубай-Душанбе ҳафтае се маротиба-рӯзҳои душанбе, чоршанбе ва шанбе сурат мегиранд. Вақти парвоз аз фурудгоҳи пойтахтамон рӯзҳои душанбе — 18.30 ба вақти маҳаллӣ, рӯзҳои чоршанбеву шанбе – соати 21:00. Дар робита бо иқдоми мазкур ширкати ҳавопаймоии «Сомон Эйр» барои мусофироне, ки барои рӯзҳои 17-ум, 24-ум ва 31-уми декабр чипта мехаранд нархномаи махсус — 180 евро ба як самт пешниҳод медорад. Дар айни ҳол парки ҳавопаймоии «Сомон Эйр» аз 2 ҳавопаймои «Боинг 737-900», 2 ҳавопаймои «Боинг 737-800» ва 2 ҳавопаймои «Боинг 737-300» иборат аст. Ширкати ҳавопаймоӣ ба ҷуз кишварҳои ИДМ, ҳамчунин ба Франкфурти лаби Майн, Истанбул, Дубай ва Урумчи парвозҳо анҷом медиҳад.