М. Неъматов: таълиму тарбияи ҷавонон дар мадди аввал аст

Душанбе, 4 декабр. (АМИТ «Ховар», Ибодат Давлатова).- Имрӯз раиси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон Маликшо Неъматов дар Донишгоҳи тарбияи ҷисмонии ба номи Саймуъмин Раҳимов бо ҷавонон мулоқот намуд.   Дар вохӯрӣ намояндагони дастгоҳи Ҳукумати Ҷумҳурии Тоҷикистон, зерсохторҳои Кумитаи ҷавонон ва Донишгоҳи тарбияи ҷисмонӣ иштирок намуданд. М. Неъматов ба ҷавонон дар бораи Қонунҳои «Дар бораи масъулияти падару модар дар таълиму тарбияи фарзанд», «Танзиму анъана ва ҷашну маросимҳо» ва инчунин оид ба Қонуни «Дар бораи озодии виҷдон ва итиҳодияҳои динӣ» суҳбат намуд. Ӯ ҳамчунин аз ҷинояткорӣ дар миёни ҷавонону наврасон, ҷалби онҳо ба ҳар гуна ҳаракату равияҳои бегона изҳори нигаронӣ кард ва онро натиҷаи бемасъулиятии падару модарон номид.Инчунин корманди дастгоҳи Ҳукумати Ҷумҳурии Тоҷикистон Тоҳир Рашидов дар бораи муносибати дин ва давлатдорӣ дар кишвар бо назардошти фарҳангу маданияти миллат ва тарбияи дурусти ҷавонон ибрози ақида намуд.