Ҷопон лоиҳаҳои кӯмакҳои бебозгаштро амалӣ менамояд

Душанбе, 30 январ. (АМИТ «Ховар», Дилшодаи Хайруллоҳ).- Ҳукумати Ҷопон дар чаҳорчӯбаи кӯмакҳои бебозгашти лоиҳаҳои амнияти башарӣ барои бахши аъзами аҳолӣ дар Ҷумҳурии Тоҷикистон алҳол татбиқи лоиҳаҳои гуногун дар соҳаҳои мухталифро дастгирӣ намудааст.Тибқи Барномаи кӯмакҳои бебозгашт 30 январи соли 2013 Ҳиройуки Имаҳаши, Сафири Ҷопон дар Ҷумҳурии Тоҷикистон, созишномаҳои грантиро оид ба амалӣ гаштани 5 лоиҳаи мухталиф барои дастгирии соҳаи маориф дар шаҳрҳои Ваҳдат, Кӯлоб ва Турсунзода, инчунин баҳри рушди соҳаи кишоварзӣ дар ноҳияи Муъминобод ва барои беҳтар намудани сатҳи зиндагии занон ва оилаҳои онҳо дар шаҳри Норак ба имзо хоҳад расонд. Тавассути лоиҳаҳои кӯмакҳои бебозгашт лоиҳаҳои зайл роҳандозӣ мешаванд: «Лоиҳаи сохтмони мактаб дар деҳаи Корези Поён, ҷамоати Зиракии шаҳри Кӯлоб» бо маблағи 111,421 доллари ИМА, Лоиҳаи сохтмони маркази занон дар шаҳри Норак» бо маблағи 110,653 доллари ИМА, Лоиҳаи дастрас намудани таҳҷизоти мактабӣ барои мактабҳои миёна дар шаҳри Ваҳдат», бо маблағи 104,844 доллари ИМА, «Лоиҳаи дастрас намудани таҳҷизотҳои кишоварзӣ барои ҷамоати Балхобии ноҳияи Муъминобод» бо маблағи 108,572 доллари ИМА , Лоиҳаи дастрас намудани таҳҷизоти мактабӣ ба 6 мактаби миёна дар шаҳри Турсунзода» бо маблағи 108,910 доллари ИМА.