Кумитаи дин: «Сарфаи умумӣ-9 миллиард сомонӣ»

Душанбе, 8 январ. (АМИТ «Ховар», Дилшодаи Хайруллоҳ).- «Дар соли 2012 дар миқёси ҷумҳурӣ 153 ҳазору 326 маърака барпо гашта, зиёда аз 462 миллион сомонӣ хароҷот шудааст. Харҷи як маърака ба ҳисоби миёна ба 3014 сомонӣ рост меояд. Умуман сарфаи умумӣ дар панҷуним соли амали қонун ба 9 миллиард сомонӣ мерасад», -зикр намуд зимни нишасти матбуотӣ ба хабарнигорон раиси Кумитаи корҳои дини назди Ҳукумати ҶТ А.Холиқов. Мавсуф зикр намуд, ки кормандони Кумита дар самти назорати риояи Қонуни мазкур бо мақсади пешгирии эҳтимолияти ҳуқуқвайронкунӣ рейдҳо ташкил намуда, бештар аз 140 маърака ва маросимҳоро, ки дар ҳудуди шаҳраку маҳаллаҳои ноҳияҳои шаҳри Душанбе ва атрофи он баргузор гардиданд, назорат намуда, бо роҳи фаҳмондадиҳӣ эҳтимолияти содир гардидани қонуншиканиро дар беш аз 70 ҳолат пешгирӣ намуданд. Ҳамчунин аз ҷониби комиссияи доимӣ 227 мавод доир ба вайрон намудани талаботи Қонун ба мақомоти судӣ ворид шуда, 212 адади он моҳиятан баррасӣ гашта, 592 ҳазору 875 сомонӣ ҷарима ситонида шудааст, зикр шуд зимни нишасти матбуотӣ.