Меъёри барқ дар Тоҷикистон аз вазъи ҳаво вобаста аст,-мегӯяд А. Ёров

Душанбе, 31 январ. (АМИТ «Ховар», Кристина Эрлих). – «Аз миён бардоштани меъёри истифодаи нерӯи барқ дар кишвар аз вазъияти боду ҳаво вобаста аст»,-гуфт зимни нишасти матбуотӣ раиси ШСХК «Барқи Тоҷик» Абдулло Ёров.Сарвари ширкати холдингии давлатӣ дар мавриди бардоштани меъёри истифодаи нерӯи барқ дар соли ҷорӣ ба хабарнигорон чунин гуфт: «Дар мавриди аз миён бардоштани меъёри истифодаи нерӯи барқ ягон кас ҷавоби аниқ дода наметавонад, на ягон мутахассис, на ягон муҳандис ва ҳатто ягон олим ҳам ҳисоб карда наметавонад, ки захираҳои мо то кадом муддат мерасанд ва кадом вақт метавон меъёрро аз миён бардошт. Имсол вазъият нисбат ба соли гузашта хеле беҳтар аст. Дар айни замон захираи оби обанбори Норак аз нишонаи гузошташуда 25 метр баландтар аст, яъне назар ба ҳамин давраи соли гузашта 1,84 метр болотар аст. Ин маънои онро дорад, ки мо то имрӯз назар ба соли гузашта бештар аз 150 млн. кВт.с қувваи барқ дорем. Тибқи мушоҳидаҳои чандинсола, сатҳи об дар дарёи Вахш 10 апрел то нуқтаи зарурӣ боло мебарояд ва танҳо пас аз ин аҳолии мамлакат пурра бо нерӯи барқ таъмин мегарданд». Ёдовар мешавем, ки меъёри истифодаи нерӯи барқ дар ҷумҳурӣ аз 7 октябри соли 2012 ҷорӣ гардида, он ба шаҳри Душанбе, инчунин шаҳрҳои калони саноатӣ ва марказҳои вилоятҳои кишвар дахл надорад.