Н. Саидов: «Шароити муосири таълимиро муҳайё мекунем»

Душанбе, 8 январ. (АМИТ «Ховар»,Фарзона Достонзода).-Ҳаҷми маблағгузории соҳаи маориф бо назардошти барномаҳои инвеститсионӣ ва маблағҳои махсус дар соли 2012 1607,9 млн. сомониро ташкил дод, ки он нисбат ба соли 2011 18 фоиз зиёд мебошад ва соли 2013 маблағгузории соҳаи маориф 2 миллиарду 130 миллиону 836 ҳазор сомонӣ пешбинӣ гардид, — афзуд вазири маорифи Тоҷикистон Нуриддин Саидов 7 январ дар нишасти матбуотӣ.  Дар соҳаи маориф 7 лоиҳаи инвеститсионӣ бо арзиши умумии 87,9 млн. доллари амрикоӣ татбиқ мегардад. Аз аввали татбиқи лоиҳаҳои сармоягузорӣ то 31 декабри соли 2012 65,8 млн. доллари амрикоӣ азхуд щудааст. Бо мақсади таъмини муассисаҳои таҳсилоти умумӣ ва муҳайё сохтани шароити муосири таълимӣ барои хонандагон ва омӯзгорон аз ҳисоби маблағҳои лоиҳаҳои сармоягузорӣ, сафоратхонаҳо ва ташкилотҳои хориҷӣ дар соли 2012 47 иншооти соҳаи маориф иборат аз 280 синфхона барои 6720 ҷойи нишаст бо тамоми таҷҳизоти таълимӣ бо сифати хуб ба истифода дода шуд, ки нисбат ба соли 2011 22 иншоот зиёд мебошад.