Тоҷикистон содироти асалро афзоиш медиҳад

Душанбе, 31 январ.(АМИТ «Ховар», Марзия Саидова).- Тоҷикистон дар соли сипаригардида ба хориҷи кишвар дар баробари пахтаю алюминий, инчунин картошка, кӯчати помидор, асал, зағир ва тухми сабзавот содир намудааст.  Вазири рушди иқтисод ва савдои ҷумҳурӣ Шариф Раҳимзода мегӯяд, ки танҳо дар соли гузашта Тоҷикистон ба Афғонистон 60 тонна зағир содир намудааст. Инчунин ба дигар кишварҳои хориҷӣ 1500 оилаи занбӯри асал фурӯхта шуд. Ин равандҳо нав буда ва он маҳсулоте, ки дар хориҷи кишвар ба он талабот зиёд аст, бояд истеҳсоли онро рушд диҳем, афзуд вазир. Хусусан соҳаи занбӯри асалпарвариро, зеро вобаста ба воридшавии Ҷумҳурии Тоҷикистон ба Созмони Ҷаҳонии Савдо ва кушода шудани бозорҳои кишварҳои аврупоӣ ва дигар кишварҳои аъзои ин созмони бонуфузи молиявӣ заминаи хубу мусоид ҷиҳати рушди соҳаи занбӯри асалпараварӣ дар кишвар фароҳам хоҳад омад. Дар ин самт танҳо бояд стандартҳои байналмилалиро риоя намоем. Яъне бояд маҳсулоте истеҳсол кард, ки ба талабот ва стандартҳои ҷаҳонӣ ҷавобгӯ буда, рақобатпазир бошад. Дар масъалаи рушди соҳаи занбӯри асалпарварӣ дар кишвари мо мушкилот вуҷуд надорад. зеро иқлим ва мавқеи ҷуғрофии ҷумҳурӣ барои рушди соҳаи занбӯри асал мусоид буда, танҳо таблиғот ва дар шакли дуруст, хусусан тавассути зарфу борҷомаҳои махсус содир намудани он ба бозори ҷаҳон афзалияти бештар дорад.