Вохӯрии самарабахш бо «Тоҷикистон WIS»

Душанбе, 28 январ. (АМИТ «Ховар», Дилшодаи Хайруллоҳ).- Чанде пеш вохурии вазири кишоварзии Ҷумҳурии Тоҷикистон Қ.Қосимов бо директори ширкати ВИС (С.А.) ЛТД Питер Вейкфилд ва раиси ширкати ВИС (С.А.) ЛТД дар Тоҷикистон Ф.Раҳмонов доир гардид. Ёддовар мешавем, ки тибқи қарори Ҳукумати Ҷумҳурии Тоҷикистон дар Ҷумҳурии Тоҷикистон бо дастгирии молиявии Бонки рушди Осиё оид ба сертификатсияи нахи пахта бозрасии мустақили пахта — «Тоҷикистон ВИС» таъсис дода шуд.Бо дастгирии молиявии бозрасии мазкур ташхисгоҳҳои ноҳияи Бохтари вилояти Хатлон ва шаҳри Хуҷанди вилояти Суғд пурра таъмиру тармим гардида, бо техникаи ҳозиразамон муҷаҳҳаз шудаанд. Ҳамзамон аз тарафи ҳамкорони хориҷии ширкати «Вейкфилд Инспекшн Сервисес» 16 нафар мутахассис нозукиҳои гузаронидани ташхиси нахи пахтаро аз тариқи техника омӯхтанд ва бо ҷои кори доимӣ таъмин гардиданд. Аз соли 2008 то соли 2012 аз тарафи ширкати «Тоҷикистон ВИС» (бозрасии мустақили пахта) ба маблағи 465 ҳазор доллари амрикоӣ навъбандии зиёда аз 155 ҳазор тонна нахи пахта гузаронида шуд. Вазири кишоварзӣ Қ.Қосимов зимни вохӯрӣ оид ба навъбандии нахи пахтаи тоҷик тавассути таҷҳизоти ҳозиразамони Эйч-ви-ай (HVI), болоравии нархи он дар бозори ҷаҳонӣ ва ғанӣ гардонидани буҷаи ҷумҳурӣ изҳори ақида намуд.