20 ҳазор қаламчаи гули садбарг омодаи фурӯш аст

Кӯлоб, 21 феврал. (АМИТ «Ховар», С.Холов). – Аз оғози маъракаи ниҳолшинонӣ кормандони Корхонаи фаръии давлатии ниҳолпарварӣ ва кабудизоркунии шаҳри Кӯлоб дар хиёбону гулгашт ва кӯчаҳои шаҳр беш аз 2 ҳазор бех ниҳоли ороишӣ шинониданд. Солҳои охир дар ин муассиса парвариши ҳама намуди ниҳолҳои ороишию сояафкан ба роҳ монда щуда, бо мақсади сари вақт шинонидани гулҳои мавсимӣ дар хиёбону гулгаштҳо дар айни ҳол дар гармхонае, ки дар майдони 20 садяк замин бунёд ёфтааст, беш аз 250 ҳазор гули мавсимӣ парвариш мешавад. Имсол вобаста ба талабот беш аз 20 ҳазор қаламчаи гули садбарг омода шуда ва як қисми ин қаламчаҳою 32 ҳазор бех ниҳол аз ниҳолхонаи корхона ба фурӯш бароварда мешавад.