Баргузории ҷаласаи Комиссияи байниҳукуматӣ

Душанбе, 5 феврал.(АМИТ «Ховар», Марзия Саидова).-Интизор меравад, ки дар ҷаласаи навбатии Комиссияи байниҳукуматии ҳамкориҳои иқтисодию тиҷоратии Тоҷикистону Русия, ки баргузории он ҳафтаи оянда дар Душанбе дар назар дошта шудааст, маҷмӯи масъалаҳои вобаста ба таҳкими ҳамкориҳои иқтисодию тиҷоратии Тоҷикистону Русия матраҳ хоҳанд гашт. Интизор меравад, ки дар ҷараёни ҷаласаи муштарак санадҳои ҳамкорие, ки моҳи октябри соли 2012 дар Душанбе зимни музокироти Сарони кишварҳои Тоҷикистону Русия Эмомалӣ Раҳмон ва Владимир Путин ба тавофуқ расида буданд, имзо хоҳанд шуд. Созишномаҳо оид ба ҳамкорӣ дар соҳаи таҳвили маҳслуоти нафтӣ ба Ҷумҳурии Тоҷикистон, дар бораи рушди ҳамкориҳо дар бахши муҳоҷират аз ҳамин қабиланд. Мавриди зикр аст, ки Федератсияи Русия яке аз шаркиони натанҳо стратегӣ балки иқтисодии Тоҷикистон буда, миёни Тоҷикистон ва минтақаҳои алоҳидаи Русия 75 созишномаи ҳамкорӣ ба имзо расидааст ва танҳо дар соли 2011-ум 64 воҳиди ҳудудии Русия бо Тоҷикистон амалиётҳои тиҷоратӣ анҷом додаанд.