Боздиди ҳайати ИМА аз Тоҷикистон

Душанбе, 28 феврал. (АМИТ «Ховар»). – Ҳайати ҳукуматии ИМА бо сардории муовини ёвари котиби давлатӣ оид ба Осиёи Ҷанубӣ ва Марказӣ Линн Трейси ва муовини ёвари вазири мудофиаи ИМА оид ба Афғонистону Покистон ва Осиёи Марказӣ Дэвид Сидни ба шаҳри Душанбе омад. Тавре ки аз Сафорати ИМА дар Тоҷикистон ба АМИТ «Ховар» хабар доданд, намояндагони Иёлоти Муттаҳидаи Амрико дар шаҳри Душанбе масоили марбут ба ҷараёни воқеаҳои Афғонистонро бо шахсони расмии Ҳукумати Ҷумҳурии Тоҷикистон мавриди муҳокима қарор медиҳанд.Ба ҳайати ИМА ҳамчунин муовини намояндаи махсус оид ба Афғонистону Покистони Раёсати давлатӣ сафир Ҷеймс Уорлик ва муовини сардори Ситоди ҳайати фармондеҳони муттаҳиди Қувваҳои байналмилалии мусоидат ба амнияти Афғонистон генерал – майор Лоуренс Николсон шомиланд.