«Фарҳанги Доро»— сафҳаи тоза дар луғатнигории тоҷик

Душанбе, 12 феврал.(АМИТ «Ховар», Баҳманёр Муродов).-Пажуҳишгоҳи фарҳанги форсӣ-тоҷикии Сафорати Ҷумҳурии Исломии Эрон дар Тоҷикистон китоби нави шоири маъруфи тоҷик, барандаи Ҷоизаи давлатии Тоҷикистон ба номи Рӯдакӣ Доро Наҷотро бо номи «Фарҳанги Доро» ба нашр расонид.  Ин китоб баргузидаи тафсири беш аз панҷ ҳазор вожа, истилоҳ, таркиб ва ибораҳои рехтаи забони тоҷикиро фаро гирифтааст. Алиасғари Шеърдӯст, Сафири Ҷумҳурии Исломии Эрон дар Тоҷикистон ба ин луғатнома пешгуфтори муфассале навишта, ба фарҳанги якзабонаи тоҷикӣ ба тоҷикии Доро Наҷот баҳои баланд додааст. Мавриди зикр аст, ки муаллиф ба навиштани ин луғатнома пас аз пажуҳишҳои тӯлонӣ ва омӯзиши дақиқи осори шоирони пешину муосир комёб гардидааст ва «Фарҳанги Доро» туҳфаи арзишманди шоир ба аҳли илму адаби кишвар маҳсуб мешавад.