Истиқболи Наврӯз бо тозакориҳо

Душанбе, 26 феврал.(АМИТ «Ховар», Марзия Саидова).-Бо мақсади дар сатҳи баланд истиқбол намудани ҷашни байналмилалии Наврӯз рӯзҳои 2, 9 ва 16-уми март дар шаҳри Душанбе ҳашари умумишаҳрӣ бо иштироки аҳли ҷамоатчигии пойтахт гузаронида мешавад. Масъалаи гузаронидани ҳашари умумишаҳрӣ яке аз масъалаҳое буд, ки дар ҷаласаи шаҳрдории Душанбе матраҳ гардид. Маҳмадсаид Убайдуллоев –раиси шаҳри Душанбе дар робита ба ин масъала фаъолони пойтахтро ба тарҳрезию амалисозии нақшаҳои ободонӣ ва беҳтар намудани сатҳу сифати хизматрасонӣ ҳидоят намуда, зикр кард, ки дар ин самт бояд бо масъулияти баланди шаҳрвандӣ муносибат кард. Дар ҷаласа ҳамзамон соири масоили марбут ба рушди соҳаҳои мухталифи пойтахт мавриди баррасӣ қарор дода шуд.