Муҳокимаи масоили рушди нерӯгоҳҳои хурд

Душанбе, 28 феврал. (АМИТ «Ховар»). – Бо дастгирии Раёсати Созмони амнияту ҳамкорӣ дар Аврупо 27 феврал дар шаҳри Душанбе семинари якрӯза аз рӯи масъалаи рушди нерӯгоҳҳои хурди барқии Тоҷикистон баргузор гардид. Семинар зимни ҳамкорӣ бо Маркази рушди гидроэнергетикаи хурди Тоҷикистону Норвегия таҳти васояти Вазорати энергетика ва саноати Ҷумҳурии Тоҷикистон баргузор шуд.Дар ҷараёни семинар консепсияи нав ҷиҳати беҳдошти вазъи сармоягузорӣ дар бахши нерӯгоҳҳои хурд ироа гардид. Консепсияро аъзои Гурӯҳи байниидоравии корӣ тарҳрезӣ намуда, ҷиҳати арзёбии минбаъда ва қабули он манзури Парлумон кардаанд. Иштирокдорони семинар консепсия, вазъи ҳозира ва имконияти минбаъдаи бахши нерӯгоҳҳои хурд, ҳамчунин натоиҷи лоиҳаҳои ҷориро мавриди муҳокима қарор доданд.Дар ин бора аз Раёсати Созмони амнияту ҳамкорӣ дар Аврупо воқеъ дар Тоҷикистон хабар доданд.