Омодагиҳо ба таҷлили Рўзи Артиши миллӣ

Душанбе, 19 феврал. ( АМИТ «Ховар», Назир Назиров).- 16-уми феврали соли ҷорӣ бо истифода аз мусоидии вазъи ҳаво зиёда аз 200 нафар донишҷўй ва хонандаи мактабҳои таҳсилоти умумии ноҳияи Фирдавсии пойтахт ба ҳашари умумиҷумҳуриявӣ баромаданд. Тавре ки роҳбари ташкилоти ҷамъиятии ҷавонон- «Созандагони Ватан» Ҳ.Табаров иброз намуд, иқдоми ташкилоти мазкур дар якҷоягӣ бо мақомоти иҷроияи ҳокимияти давлатии н. Фирдавсӣ сурат гирифта, ҳадафи чорабиниҳо омодагӣ ба таҷлили 20-солагии Рўзи Артиши миллии Ҷумҳурии Тоҷикистон мебошад. Мақсади асосӣ — ба ин восита дар қалби ҷавонон меҳри ватандориро ҳар чӣ бештар бедор намудан аст. Чунин иқдом охири кор набуда, масъулин иброз доштанд, ки ба муносибати ҷашнҳои дигар, аз ҷумла Иди байналмилалии Наврўз маъракаи ниҳолшинонӣ ва покиза нигоҳ доштани атрофи маҳалҳо ба нақша гирифта шудааст.