Омодагии Бонки рушди Авруосиё ба маблағгузории соҳаи истеҳсоли орд

Душанбе, 13 феврал. (АМИТ «Ховар», Бекназари Абӯбакр). — Сатҳи ҳамкориҳои дуҷонибаи кунунӣ, аз ҷумла татбиқи лоиҳаҳо дар Ҷумҳурии Тоҷикистон, хосса дар вилояти Суғд, ки аз ҷониби Бонки рушди Авруосиё маблағгузорӣ мешаванд, чанде қабл зимни мулоқоти раиси вилояти Суғд Қоҳир Расулзода бо муовини раиси раёсати бонки мазкур Канат Досмуҳаммедов мавриди баррасӣ қарор гирифт.Аз хадамоти матбуоти раиси вилояти Суғд ба АМИТ «Ховар» иттилоъ доданд, ки Қ. Расулзода ба ҷараёни ҳамкориҳои тарафайн баҳои мусбат дода, онро самарабахш арзёбӣ намуд. Зикр гардид, ки ба фаъолият шуруъ намудани яке аз корхонаи бузурги саноатии вилоят Ҷамъияти саҳомии пӯшидаи «Олимтекстайлз» маҳз бо дастгирии молиявии Бонки рушди Авруосиё амалӣ гардидааст.Мавриди ёдоварист, ки тирамоҳи соли 2009, ҳамагӣ баъд аз чанд моҳи шомил шудани Ҷумҳурии Тоҷикистон ба ҳайати иштирокдорони Бонки рушди Авруосиё, ин бонк дар кишвар ташкили корхонаи истеҳсоли нахи пахтаи аълосифатро бо иқтидори 5 ҳазор тонна дар як сол маблағгузорӣ кард. Лоиҳаи сохтмони фабрикаи нахбарории муосирро Ҷамъияти саҳомиии пӯшидаи «Олимтекстайлз» дар ноҳияи Мастчоҳ амалӣ намуд.Ҳаҷми умумии маблағгузории ин лоиҳа қариб ба 30 миллион доллари амрикоӣ баробар аст, ки саҳми иштироки Бонки рушди Авруосиё дар ин лоиҳа наздик ба 23 миллион доллар аст.Канат Досмуҳаммедов ба рушди бонизоми соҳаҳои иқтисодиву иҷтимоии вилоят баҳои баланд дода, омодагии бонкро бобати баррасии лоиҳаҳое, ки ба ташкили истеҳсолоти орд, макарон ва семент дар қаламрави вилояти Суғд дар назаранд, таъкид намуд.