Пешгирӣ аз чор ҳодисаи қочоқи маводи мухаддир

Душанбе, 27 феврал. (АМИТ «Ховар», Бекназари Абӯбакр). — Кормандони мақомоти амнияти миллии кишвар дар ҳудуди минтақаҳои наздисарҳадии Тоҷикистон бо Афғонистон ва Фурудгоҳи байналмилалии Кўлоб боз 4 кўшиши қочоқи маводи мухаддирро барбод доданд. Аз маркази робитаҳои ҷамъиятии Кумитаи давлатии амнияти миллии Ҷумҳурии Тоҷикистон ба АМИТ «Ховар» иттилоъ доданд, ки аз тарафи кормандони РКДАМ дар ВМКБ ва марзбонони Сарраёсати Қӯшунҳои сарҳадӣ бо гумони даст доштан дар муомилоти ғайриқонунии маводи мухаддир шаҳрванд Сулаймоншоев Тутишо Нуралишоевич, сокини деҳаи Буведи ҷамоати Поршневи ноҳияи Шуғнон боздошт гардид. Номбурда дар бозори наздисарҳадии «Тем»-и шаҳри Хоруғ бо Нурак ном шаҳрванди Ҷумҳурии Исломии Афғонистон дар хусуси бар ивази 400 доллар дастрас намудани 240 грамм героин маслиҳат анҷом дода, бо кўмаки шаҳрванд Аҳмадбеков Фахриддин Тоҳирбекович маводи нашъаоварро ба манзили истиқоматиаш овардааст.Ҳодисаи дигари интиқоли маводи нашъаовар 21 феврал тавассути сарҳади давлатии Тоҷикистону Афғонистон дар ҳудуди деҳаи Пашори ҷамоати Поршневи ноҳияи Шуғнон пешгирӣ шуд. Дар натиҷаи тирпарронӣ марзшиканон ба самти Афғонистон фирор намуданд. Зимни азназаргузаронии ҷойи ҳодиса 70 килограмм ҳашиш дарёфт ва мусодира гардид. Инчунин кўшиши убури ғайриқонунии сарҳади давлатӣ аз ҷониби шаҳрвандони Афғонистон дар ҳудуди деҳаи Шоҳони ноҳияи Шўрообод барбод дода шуд. Дар ҷараёни амалиёт қочоқчиён таҳти сарварии Низом валади Иброҳими 38-сола, сокини қарияи Каҷии улусволии Хоуни вилояти Бадахшон 2 борхалтаро бо 10 килограмму 850 грамм бангдона дар маҳалли воқеа партофта, ба тарафи Афғонистон фирор карданд.Рўзи 17 феврали соли равон кормандони ГФ РКДАМ ҶТ дар вилояти Хатлон дар якҷоягӣ бо намояндагони Хадамоти гумрук дар «Фурудгоҳи байналмилалии Кўлоб» зимни бақайдгирии мусофирони хатсайри «Кўлоб-Москва» сокини шаҳри Кўлоб Акрамов Абдулҳамид Абдулмаҷидовичи 24-соларо бо гумони даст доштан дар қочоқи маводи мухаддир боздошт намуданд. Ҳангоми гузаронидни муоинаи тиббӣ дар меъдаи номбурда 38 бастаи полиэтилинӣ бо вазни умумии 335 грамм героин дарёфт ва мусодира гардид. Тафтишоти пешакӣ муайян кард, ки дар содир намудани ҷинояти гардиши ғайриқонунии маводи мухаддир ба Абдулҳамид Акрамов шаҳрвандон Зиёдов Баҳром Раҷабалиевич, соли таваллудаш 1987, сокини шаҳри Кўлоб ва Норқулов Файзиддин Рӯзимуродович, соли таваллудаш 1987, сокини ҳамин шаҳр кўмак расонидаанд. Онҳо ният доштанд, ки героинро тавассути ҳавопаймо ба шаҳри Маскав интиқол диҳанд.Дар айни замон нисбат ба ҳодисаҳои мазкур парвандаҳои ҷиноятӣ оғоз гардида, тафтишоти пешакӣ идома доранд.