Т.Назаров – профессори фахрии Академияи миллии ҶМЧ

Душанбе, 28 феврал. (АМИТ «Ховар»). — 26 феврал дар Академияи миллии стратегияи иқтисодии Чин ҷаласаи васеи шӯрои илмӣ баргузор гардида, дар он ба олими маъруфи тоҷик ходими давлатию ҷамъиятӣ, академики Академияи илмҳои Ҷумҳурии Тоҷикистон Талбак Назаров диплом дар бораи ба мавсуф додани унвони «Профессори фахрӣ» супурда шуд. Президенти Академия профессор Гао Пейон зимни суханрониаш зикр намуд, ки ҳукумати Чин ба рушди муносибатҳо бо Ҷумҳурии Тоҷикистон таваҷҷӯҳи хоса зоҳир мекунад. Мавсуф аз аз дастовардҳои ҳамкории тиҷоратию иқтисодии Чин ва Тоҷикистон муфассал нақл кард.Сафири Ҷумҳурии Тоҷикистон дар ҶМЧ Рашид Олимов олимони иқтисоддони Чинро даъват намуд, ки ҳамкориро бо олимони тоҷик густариш бахшида, равобитро бо муассисаҳои илмии бахши иқтисоди Тоҷикистон ривоҷ диҳанд.Қобили зикр аст, ки Талбак Назаров аввалин олими соҳаи иқтисодиёти давлатҳои Осиёи Марказист, ки бо унвони «Профессори фахрӣ» — и Академияи стратегияи иқтисодии Чин сарфароз шудааст. Академияи миллии стратегияи иқтисодии Чин муассисаи тадқиқоти илмӣ ба шумор рафта, моҳи июни соли 1978 бо дастури «падари ислоҳоти Чин» Дэн Сяопин таъсис ёфта буд. Дар ин бора аз Раёсати иттилоот, матбуот, таҳлил ва тарҳрезии сиёсати хориҷии ВКХ ҶТ ба АМИТ «Ховар» хабар доданд.