Таъсиси маркази ташхисӣ бо системаи телемедитсина

Душанбе, 19 феврал. (АМИТ «Ховар», Ибодат Давлатова).-Ҳамкориҳо бо Ҷумҳурии Фаронса дар сатҳи баланд қарор доранд ва аз фурсати муносиб истифода бурда мо миннатдории бепоёни хешро изҳор менамоем, гуфт зимни вохӯрии имрӯза вазири тандурустии кишвар Нусратулло Салимов бо сафири Фаронса дар Ҷумҳурии Тоҷикистон Дидйе Леруа. Сафири Фаронса дар Тоҷикистон Дидйе Леруа низ изҳор дошт, ки аз ҳамкориҳо бо Вазорати тандурустӣ қаноатманд аст. «Мо омодагии хешро ҷиҳати рушди соҳаи тандурустии кишвари Тоҷикистон иброз медорем», — илова намуд сафир.Бояд зикр кард, ки барои анҷом додани даврҳои эмгузаронӣ бар зидди бемории фалаҷ ба ҷумҳурӣ ба маблағи 125 ҳазор евро 600 ҳазор вояи ваксина дастрас гардидааст. Дар баробари ин, Вазорати тандурустӣ бо мақсади дарёфти саривақтии беморони сил, аз ҷумла сили шакли мутобиқгашта ва дигар бемориҳои сироятӣ, дар доираи ҳамкориҳои мутақобилан судманд бо озмоишгоҳи Ассотсиатсияи Мерёи давлати Фаронса, бо дастгирии Хазинаи ҷаҳонӣ дар ҳудуди Пажуҳишгоҳи гастроэнтерология сохтмони Озмоишгоҳи минтақавии тандурустии ҷамъиятии ба номи Рудолф Мерёро бо маблағи 13 млн. 765 ҳаз. 980 сомонӣ анҷом дод. Чунин озмоишгоҳи замонавӣ ва пуриқтидор то ҳол дар кишварҳои Иттиҳоди Давлатҳои Мустақил вуҷуд надорад. Озмоишгоҳ бо лавозимоти техникию тиббии муосир бо маблағи 1 млн. 371 ҳаз. 37 сомонӣ ҷиҳозонида шуда, барои дарёфти саривақтии бемориҳои сироятӣ мусоидат менамояд. Ифтитоҳи расмии иншооти мазкур дар арафаи ҷашни Наврўз ва дар давоми соли 2013 ба нақша гирифта шудааст.Ҳамчунин дар назар аст, як Маркази ташхисӣ бо системаи телемедитсина, ки бо муассисаҳои махсуси тандурустӣ пайваст мегардад, таъсис дода шавад.